పులి స్నానం చేస్తున్నట్టు గా వైరల్ అవుతున్న వీడియో కర్ణాటకలోని కూర్గ్ లో తీసినది కాదు

ద్వారా: రాజేశ్వరి పరస
ఆగస్టు 18 2023

ఈ కథనాన్ని షేర్ చెయ్యండి:

నేపధ్యం 

దక్షిణ భారత దేశంలోని కర్ణాటక రాష్ట్రంలోని కూర్గ్ అనే ఊరులో ఉన్న కాఫీ తోటలలో ఒక పులి రబ్బరు టబ్బు లో స్నానం చేస్తున్నట్టు గా ఉన్న వీడియో ఇటీవల వైరల్ అయ్యింది. ఈ పోస్ట్ ని నటీమణి రష్మిక మందన్న కూడా ఇలా రాస్తూ రీపోస్ట్ చేశారు, “కూర్గ్ లో ఏదైనా సాధ్యమేనని మళ్ళీ నిరూపణ అయ్యింది. “

ఎన్ డి టి వి మరియు ఆసియా నెట్ లాంటి వార్తా వెబ్సైట్ లు 2020లో ఇలాంటి శీర్షికలతోనే ఇది కూర్గ్ లో జరిగినట్టుగా రాసుకొచ్చారు. 

అయితే ఇది కూర్గ్ లో జరిగినది కాదు. పైగా ఈ మధ్య కాలంలో జరిగినది కూడా కాదు. 

వాస్తవం

మేము దీని గురించి గూగుల్ లో వెతికిన వెంటనే మాకు ఈ వీడియో 2020 నుంచి ఇలాంటి శీర్షికలతోనే వైరల్ అవుతుందని అర్థమయ్యింది. 

ఈ వీడియోలోని కీ ఫ్రేమ్స్ ని  రివర్స్ ఇమేజ్ సెర్చ్ ద్వారా వెతికితే అమెరికాలోని కరోలినా టైగర్ రెస్క్యూ అనే సంస్థ X లో పోస్ట్ చేసిన పోస్ట్ దొరికింది. ఆ సంస్థ ఒక పులి టబ్ లో స్నానం చేస్తున్న  వీడియోని జూన్ 11, 2020 లో పోస్ట్ చేశారు. దాని శీర్షిక గా ఇలా రాశారు- మడోన్నా అనే పులి నిన్న తన పూల్ లో స్నానం చేసింది. ఈ పూల్స్ అనేవి వేసవి కాలం లో పులులని చల్లగా ఉంచడానికి తోడ్పడతాయి, పైగా వాటికి ఇష్టం కూడా. దాగి ఉండటం మరియు వేటాడటం అనే నైపుణ్యాలు కలిగిన మడోన్నా ఇప్పుడు ఈ వేసవి కాలంలో ఈ టబ్ లో సేదతీర్చుకుంటుంటే తనను వెతికే పని మాకు సులువు అవుతుంది!

కరోలినా టైగర్ రెస్క్యూ వారు వారి యూట్యూబ్ ఛానల్ లో మడోన్నాకు సంబందించిన ఇతర వీడియోలు కూడా ఉన్నాయి.. పైగా వారి ‘ఇన్ మెమోరియం’ పేజీ ప్రకారం ఆ పులి ఈ మధ్యనే చనిపోయింది. 

తీర్పు

టబ్బులో  స్నానం చేస్తున్న పులి వీడియో ఉత్తర కరోలినాలోనిది, కూర్గ్ లోని కాఫీ తోటలోనిది కాదు. కనుక మేము దీనిని అబద్ధం అని నిర్ధారించాము.